काठमाडौं । इजरायली सेनाले गाजामा बमबारी जारी राखेको छ । पछिल्लो समय ‘सुरक्षित क्षेत्र’ भनिएको अल–मावासीमा आक्रमण गरेको छ ।
उक्त आक्रमणमा कम्तीमा ३६ जनाको मृत्यु भएको अन्तर्राष्ट्रिय समाचार संस्था अलजजिराले जनाएको छ । इजरायलले गाजामा थप आक्रमणको तयारी गरिरहेका बेला यो आक्रमण भएको हो । पछिल्लो समय इजरायली सेनाले स्थल आक्रमणलाई विस्तार गर्ने तयारी गरिरहेको । यसैबेला कतारमा हमाससँग युद्धविराम वार्ता पनि चलेको छ ।यसैबीच, इराकको राजधानी बग्दादमा भेला भएका अरब देशका नेताहरूले गाजामाथिको युद्ध तत्काल अन्त्य गर्न माग गरेका छन् ।उनीहरूले गाजामा मानवीय सहायता पुर्याउन अन्तर्राष्ट्रिय समुदायसँग हस्तक्षेपको अपिल गरेका छन् ।
इजरायलले प्रस्तावित सम्झौताप्रति हालसम्म सार्वजनिक प्रतिक्रिया दिएको छैन । तर वार्ता अगाडि यसले गाजाबाट आफ्ना सैनिक हटाउने वा युद्ध अन्त्य गर्ने प्रतिबद्धता नलिने स्पष्ट पारेको थियो ।
यसैबीच इजरायली सेनाले शनिबार नै अपरेसन गिदोन्स च्यारियट्स नामक नयाँ आक्रमण सुरु गरेको घोषणा गरेको थियो । दुईदिनदेखि गाजामा ठूलो हवाई हमला भएको छ । उक्त हमलामा परी उद्धारकर्मीहरूका अनुसार बिहीबारदेखि कम्तीमा ३०० जनाको मृत्यु भएको छ ।
