सरकारका प्रवक्तासमेत रहेका सूचना तथा सञ्चारमन्त्री पार्वत गुरुङले उपत्यकावासीको घरघरमा तरकारी पुर्याइने दाबी गरेका छन्। उनले काठमाडौंका छिमेकी जिल्लामा नबिकेका तरकारी सम्बन्धित जिल्ला प्रमुखसँगको सहकार्यमा उपत्यकावासीको घरसम्मै पुर्याउने बताए। उनले भने, “धादिङमा कुहिन लागेको तरकारी ल्याएर काठमाडौंवासीका घरघरमा तरकारी र खाद्य सामाग्री पुर्याउने योजना बनिरहेको छ।”
सभामुखलाई भेटेर देउवा निवासमा प्रचण्ड : माओवादी केन्द्रका अध्यक्ष पुष्पकमल दाहाल ‘प्रचण्ड’ कांग्रेस सभापति शेरबहादुर देउवालाई भेट्न बुढानिलकण्ठ पुगेका छन् । प्रतिनिधि सभाको विशेष अधिवेशनको मिति नजिकिंदै गर्दा माओवादी अध्यक्ष प्रचण्डले भेटघाटलाई तीव्रता दिएका हुन् ।
उनी केही बेरअघि प्रतिनिधि सभाका सभामुख अग्निप्रसाद सापकोटासँग उनको लैनचौरस्थित निवासमा भेटघाट सकेर बुढानिलकण्ठ पुगेका हुन् । २७ गते प्रतिनिधि सभामा प्रधानमन्त्रीले विश्वासको मत लिने कार्यक्रम तय छ ।
सो विषयमा कसरी अघि बढ्ने भन्ने छलफल गर्न र अन्य प्रतिपक्षी दलसँगको संवादबारे देउवालाई जानकारी गराउन प्रचण्ड बुढानिलकण्ठ पुगेको स्रोतले जनाएको हो । यसअघि बिहीबार एमाले नेता माधव नेपालले पनि देउवालाई निवासमा नै पुगेर भेटेका थिए । यस्तै गत बुधबार प्रधानमन्त्री ओलीसमेत एमालेका आफू निकट नेताहरूलाई लिएर देउवा भेट्न उनकै निवास पुगेका थिए ।