नेपाली चलचित्र ‘धड्कन’ को लोकप्रिय गीत ‘नाच्छ यो मन…’ सहित छाएछ वसन्त, सयौं काँडा, तिमी आयौ, तिमी बाहे आदि नेपाली गीतमा समेत आफ्नो स्वर दिइसकेकी भारतीय गायिका श्रेया घोषाल आमा बनेकी छिन् । गायिका घोषाल तथा उनका श्रीमान् शिलादित्य मुखोपाध्यायले शनिवार दिउँसो आफ्नो घरमा नयाँ सदस्यलाई स्वागत गरेका हुन् ।
गायिका घोषालले सामाजिक सञ्जालमार्फत उक्त सुखद खबर सार्वजनिक गरेकी छिन् । यसका साथै गायिका घोषालले आफ्नो लागि प्रार्थना गर्ने सबैलाई धन्यवाद समेत दिएकी छिन् । अहिले बलिउडकी यी लोकप्रिय गायिकालाई बलिउडकै सेलिब्रेटीहरुले वधाइ दिने क्रम जारी छ ।
गायिका घोषालले इन्स्टाग्राममा एउटा सन्देश शेयर गर्दै लेखेकी छिन्–‘भगवानले आज दिउँसो एउटा छोरा दिएका छन् । यो त्यस्तो भावना हो, जसलाई मैले कहिले महसूस गरेकी थिइन । शिलादित्य र मसहित परिवारका सबै सदस्य असाध्यै खुशी छौं । पाईंहरुको अनगिन्ति शुभकामनाका लागि धन्यवाद ।’
गायिका घोषालले केही समयअघि मात्र आफू गर्भवती भएको घोषणा गरेकी छिन् । उनले ट्वीट गर्दै श्रेयादित्यको आगमन हुन लागेको बताएकी थिइन् । आफ्नो बेबी बम्पको तस्बिर शेयर गर्दै उनले आफू आमा बन्न लागेको जनाएकी थिइन् । गायिका घोषालले सन् २०१५ मा शिलादित्य मुखोपाध्यायसंग विवाह गरेकी थिइन् । उनीहरु दुबै सानैदेखिका साथी हुन् ।