बिहीबार देशभर भाइटीका मनाइएको छ । तिहारको अन्तिम दिन हिजो बिहीबार भाइटीका लगाएर मनाइदा केही रोचक दृश्यहरु पनि सार्वजनिक भए । वास्तवमा यम पञ्चकको अन्तिम दिन भगवान सूर्यका छोरा यमराजलाई बहिनी यमुनाले टीका लगाएर दीर्घायुको आशिर्वाद दिएको स्मरणमा भाइटीका मनाउने गरिन्छ ।
तर, पछिल्लो समय भाइटीका दिदीभाइ-दाजुबहिनी बीच मात्र सीमित छैन । दाजुभाइ नहुने दिदी बहिनीले दिदी बहिनीबीच भाइटीका लगाउन थालेको धेरै भइसक्यो । अझ दिदी बहिनी नहुने दाजुभाइले पनि एक आपसमा टीका लगाएको छ तपाईँ हामीले देखेकै छौं । अझ जनावरसँग पनि भाइटीका लगाउने पनि उत्तिकै छन् ।
जनावरसँग बढ्दै गएको मानव प्रेमसँगै अहिले सामाजिक सञ्जालमा कुकुर, बिरालोलाई टीका लगाइदिएको भिडिओ देख्न सकिन्छ । मानिसलाई जस्तै सप्तरङ्गी टीका मालाले यी जनावर सजिएका छन् ।
आफ्नो परिवारको सदस्य जत्तिकै माया ममता दिएर पालिएका जनावरहरूसँग चाडबाड मनाएर मानिसले खुसी साटासाट गरेका छन् । घरमा पालिएका कुकुर, बिरालो र बाँदरसँग लगाएको भाइ टीकाको कतिपयले फेसबुक र टिकटकमा राखेका छन् ।
कुकुरसँग भाइटीका लगाएको तस्बिर सामाजिक सञ्जालमा भाइरल भएको छ ।
