नेपाली बालिका बारिशा थापाको नृत्यको चर्चा संसारभर चुुलिएको छ । अमेरिकी चर्चित र्यापर स्नुप डगले दक्षिण भारतीय फिल्म पुष्पाको ‘सामी सामी’मा नृत्य गरेको नेपाली बालिका बारिशा थापाको भिडियो इन्स्टाग्राममा सेयर गरेपछि थापाको चर्चा बढेको हो ।
विश्वभर करोडौँ फ्यान भएका र्यापर स्नुप डगले थापाको भिडियो सेयर गरेपछि उनको चर्चा अब हलिउडसम्म चुलिएको छ । हेटौँडा उपमहानगरपालिका वडा नं. ९ की बारिशाले विद्यालयको एक कार्यक्रमको सन्दर्भमा उक्त गीतमा नाचेको भिडियो सोही विद्यालयको एकजना शिक्षिकाले टिकटकमा सेयर गरेपछि उनको चर्चा चुलिएको थियो ।
उनको भिडियो हेरेपछि भारतीय कोरियोग्राफर रेमा डिसुजाले उनको भारतीय टिभी रियालिटी शो डान्स इन्डिया डान्समा भाग लिन निम्तो दिएका छन् ।
अभिनेत्री रश्मिका मन्दानाले सबैभन्दा पहिले बारिशाको गीतलाई ट्वीटरमार्फत सेयर गरेपछि उनको चर्चा भएको थियो । त्यसपछि हेटौंडाकी यी विश्व सेलिव्रिटीको नजरमा परेकी छन् ।
ग्रामी अवार्डमा १७ पटक मनोनयन भैसकेका स्नुप डगको उक्त भिडियोलाई इन्स्टाग्राममार्फत धेरैले हेरेका छन् । यी चर्चित अमेरिकी र्यापरको प्रसिद्धी नेपालमा समेत फैलिएको छ ।
